Pansamantalang sumilong sa ilang kalapit na covered court ang nasa tatlong daang pamilyang pawang mga residente ng Sitio Pajo Barangay Baesa sa Quezon City matapos na masunog ang kanilang mga tahanan kahapon.
Walang magawa ang mga apektadong residente kundi magsisikan muna dito habang wala pa silang matitirhan.
Karamihan sa kanila walang naisalbang gamit dahil mas inunang iligtas ang kanilang mga pamilya.
(Macky Libradilla / UNTV Correspondent)
Tags: 4 covered court, Baesa, QC, resedential area
Kinumpirma ni PNP Chief PDG Oscar Albayalde na ginagamit ng ilang incumbent politician at kandidato sa 2019 elections ang mga miyembro ng gun for hire group na nahuli ng PNP Anti-Kidnapping Group sa Quezon City at Isabela.
Ayon kay Albayalde, gobernador at alkalde ang karaniwang kumukuha ng serbisyo ng grupo na pinamumunuan ni Ricardo Peralta upang magsilbing proteksyon, ginagamit ring panakot at sa pagpatay sa kanilang mga kalaban sa pulitika.
Tumanggi naman si Albayalde na pangalanan ang mga pulitiko mula sa Nueva Ecija, Cagayan, Metro Manila, Bulacan at La Union at sa halip ay makikipag-ugnayan aniya sila sa DILG ukol dito.
Sinabi naman ni PNP-AKG Director PCSupt. Glen Dumlao, ang limang suspek ay nakuhanan ng matataas na kalibre ng baril, mga bala at granada.
Hinahanap pa naman ng AKG ang lider ng grupo na si Ricardo Peralta na may limang milyong pisong patong sa ulo mula sa Volunteers Against Crime and Corruption (VACC) dahil sa iba’t-ibang kaso.
Sinabi pa ng PNP na bago ang eleksyon ay sisikapin nilang mahuli ang mga sindikato na ginagawang private armed groups ng mga pulitiko.
Samantala, patay din sa operasyon ng pulisya sa San Pablo, Laguna ang gun for hire at illegal drugs high value target na si Christopher Alain Alvero at dalawang iba pa sa pagsisilbi ng search warrant noong Sabado.
( Lea Ylagan / UNTV Correspondent )
Tags: gun for hire group, PNP, QC
Tatlumpu’t dalawang barangay sa Mandaluyong, San Juan, Pasig at Quezon City ang makakaranas ng walong oras na water service interruption.
Batay sa abiso na Manila Water, magsisimulang mawalan ng suplay o hihina ang suplay ng tubig ng mga apektadong barangay ng alas diyes ng gabi bukas hanggang alas sais ng umaga sa Biyernes.
Ang water interruption ay bunga ng isasagawa emergency leak repair sa bahagi ng C. Benitez St. Corner Mariposa St., Barangay Horeshoe, Quezon City.
Pinapayuhan ang mga residente sa mga maapektuhang lugar na mag-imbak ng tubig.
Tags: Mandaluyong, QC, water service interruption
Tinatayang nasa apat na milyong pisong halaga ng marijuana ang nasabat ng Drug Enforcement Unit ng Quezon City Police District Station-7 sa Cubao pasado alas nuebe kagabi.
Sa pamamagitan ng info text ng NCRPO, nagsagawa ng buy bust operation ang mga pulis laban sa mga suspek na nagbebenta ng marijuana sa Mary Grace Haven apartment sa Denver Street.
Arestado ang target ng operasyon na si Grenie Hierro, 37 anyos kasama ang live-in partner nito na si Lassery Ann Rayo at apat umanong drug courier.
Ayon sa isa sa suspek na si Grenie, nag-aarkila pa siya ng van papuntang Kalinga-Apayao upang kunin ang marijuana at ibabagsak sa kanilang mga parokyano sa Metro Manila. Nasabat sa mga suspek ang 27 rinolyo na marijuana, pitong bricks ng pinatuyong marijuana at drug paraphernalia.
Samantala, naaresto naman ang dalawang lalake at isang babae matapos silang mahulihan ng iligal na droga sa isang hotel sa Pateros kagabi. Kinilala ang mga suspek na sina Lance Grijaldo, Muriel Custodio at Ian Ponce na sinasabing pamangkin ng mayor ng Pateros.
Sa inisyal na imbestigasyon ng Pateros police, nakatanggap sila ng ulat mula sa isang empleyado ng hotel na nag-aaway ang mga suspek dahil sa iligal sa droga, kaya agad rumesponde naman ang mga pulis.
Nasabat sa mga suspek ang nagkakahalaga ng 22,700 piso na kita nila sa pagbebenta ng droga at 30 gramo ng hinihinalang shabu. May nakuha ding maliit na notebook kung saan nakalista ang mga pangalan ng mga parokyano ng mga suspek.
Nabatid ng pulisya na kasama sa drug watchlist ang dalawa sa suspek na si Grijaldo at Ponce. Todo tanggi naman ang mga suspek na nagbebenta sila ng droga.
Nahaharap ang mga suspek sa kasong Comprehensive Dangerous Drugs Act of 2002.
( Reynante Ponte / UNTV Correspondent )
