Pauwi na sana ang pamilya ni Pendaton nang biglang magliyab ang sinasakyan nilang Mazda 3 sa Miralco Ave, Ortigas Center sa Pasig City pasado alas nueve kagabi.

Kwento ni Pendaton, naghazzard siya at agad na itinabi ang sasakyan nang mapansing may usok na lumalabas sa computer box ng sasakyan. Pagkatapos ay dali dali silang bumaba ng kaniyang pamilya. Ilang sandali pa, tuluyan nang nagliyab ang sasakyan.

Ayon kay Pendaton, sampung araw pa lang mula nang mabili niya ito ng dalawandaang libong piso sa isang Mark Cipriaso na nakausap niya sa facebook.

Inirereklamo na niya ito kay Cipriaso dahil hindi gumagana ang cd player at panay ang ugong ng sasakyan subalit iginiit aniya ni Cipriaso na wala itong sira.

Payo ng biktima sa mga nagbabalak bumili ng sasakyan sa internet, suriing mabuti ang bibilhin at huwag basta ma-engganyo sa mga nakikitang post sa internet.

( Macky Libradilla / UNTV Correspondent )

Tags: kotse, nagliyab, Pasig city