Lumutang ang isang tricycle driver at kinakasama nito na nakasaksi umano sa nangyari sa 19 anyos na si Carl Angelo Arnaiz at mga pulis sa Caloocan City.

Base sa salaysay na inilahad ng mga ito sa Criminal Investigation and Detection Group National Capital Region, bandang alas tres y media ng madaling araw daw noon nang makita nila ang isang lalaking naka-jacket na itim habang hinahabol ng dalawa pang lalaki sa may C3 Caloocan.

Sumigaw umano ang humahabol na mga lalaki at sinabing pulis sila. Ilang sandali pa ay nagpaputok anila ang lalaking nakajacket sa mga pulis.

Nagkapalitan na umano ng putok kaya naman napaharurot umano sila papasok sa may Torcillo street at doon nagtago.

Pagkatapos ng putukan, nagpalipas pa sila ng ilang minuto bago umalis sa kanilang pinagtataguan at doon na nila nadaanan ang nakahandusay na lalaking nakajacket na kinalaunan ay napag-alaman nila sa balitang si Carl Angelo Arnaiz.

Ayon sa tricycle driver, ayaw na sana niyang magsalita pa subalit kinukulit umano siya ng kaniyang kinakasama dahil nababagabag sa napapanood sa tv kung saan nadidiin ang dalawang pulis.

Tinanggap naman ng CIDG-NCR ang salaysay ng mga ito subalit iimbestigahan pa nila kung totoo ba ito at ano ba talaga ang motibo ng dalawa lalo pa’t ilang buwan na rin ang nakakalipas mula ng mangyari ang insidente.

Tags: 2 witness, Carl Angelo Arnaiz, CIDG-NCR