Pasado alas dose kanina ng magkabanggan ang dalawang taxi sa intersection ng A. Roces Avenue

Kinilala ang mga driver na sina Salermo Alejo, 60-anyos at Aljun Roca, 29-anyos.

Sa lakas ng impact nasira ang hood at bumper ng taxi na pagmamayari ng Goodman Transit na may plate number TXP 251 at nayupi naman ang kanang bahagi ng taxi ng Pedean Transit na may plate no. AAJ 7528.

Ayon kay Alejo, patungo sana sila ng Timog Avenue ng bigla na lang may bumangga sa gilid ng kanyang taxi.

Depensa naman ni Roca, hindi niya napansin ang taxi ni Alejo na dumaan, kaya’t nabangga niya ito.

Kapwa itinanggi ng dalawang driver na nakatulog sila habang nagmamaneho.

Nagtamo ng mga pasa sa katawan ang mga driver habang nagkaroon ng bukol sa ulo ang pasahero ni Alejo na mabilis bumaba at lumipat sa ibang taxi.

Patuloy namang inaalam ng mga otoridad kung sino sa dalawa driver ang may pananagutan sa aksidente.(Reynante Ponte/ UNTV Radio)

Tags: Aljun Roca, Salermo Alejo