Nirespondehan ng UNTV News and Rescue Team ang dalawang sugatan sa banggaan ng closed van at cargo truck sa Aurora Boulevard sa Quezon city pasado ala una ng madaling araw.

Nadatnan pa ng grupo na nasa loob ng closed van ang dalawang biktima na iniinda ang tinamong pinsala.

Kinilala ang mga nasugatan na sina Joel Acantelado, driver ng closed van at si Gina Celestial na sakay nito, kapwa mga residente ng Binangonan, Rizal.

Inalalayan ng UNTV News and Rescue Team ang dalawang biktima palabas ng sasakyan at inassess ang kalagayan ng mga ito

Nagtamo ng pamamaga sa kanang tuhod si Joel habang idinadaing naman ni Gina ang pananakit rin ng kanyang tuhod.

Agad dinala ng grupo sa UERM Memorial hospital ang mga biktima kasama ang kaanak.

Ayon sa nakakita sa pangyayari dire-diretso ang takbo ng closed van dahil naka go ang traffic light ngunit pagdating sa intersection ay binangga na ito ng patawid na cargo truck na hindi tumigil sa stop light.

Sa lakas ng impact basag ang salamin ng windshield ng closed van.

Aminado naman driver ang truck na si Allan De Vera na beating the red light siya.(Reynante Ponte/UNTV Radio Correspondent)

Tags: Aurora Boulevard sa Quezon city, closed van at cargo truck, UNTV News and Rescue Team