Hiniling ng dalawang pulis-Caloocan na i-dismiss ng Department of Justice ang mga reklamong isinampa sa kanila kaugnay ng pagpatay kina Carl Angelo Arnaiz at Reynaldo de Guzman alyas Kulot.
Nanindigan sina PO1 Jeffrey Perez at PO1 Ricky Arquilita na napatay sa lehitimong police operation si Carl matapos itong manlaban. Batay sa kanilang counter affidavit, nagpapatrolya umano sila sa kahabaan ng C-3 Road, alas tres y medya ng madaling araw noong August 18 nang nilapitan sila ng taxi driver na si Tomas Bagcal.
Nagsumbong umano ito tungkol sa panghoholdap sa kaniya ni Carl at positibong itinuro ang binatilyo. Nang komprontahin, nagpaputok ng baril si Carl kayat gumanti sila na nagresulta sa pagkamatay nito.
Ngunit iba ang bersyon ni Bagcal sa kanyang kontra-salaysay. Sumakay umano sa kaniyang taxi ang dalawang binatilyo sa Pasig City at nagpahatid sa 5th Avenue Caloocan at pagdating doon ay nagdeklara ng holdap. Sa tulong ng isang traysikel driver na nakapansin sa komosyon ay nahuli umano nila ang dalawa at itinurn over sa pulis.
Gawa-gawa lamang aniya ng mga pulis ang kwentong nanlaban si Carl dahil nakita niyang nakaluhod ito nang barilin. Itinatanggi rin ni Bagcal ang laman ng sinumpaang salaysay na una niyang ibinigay sa mga pulis.
Itutuloy sa Lunes ang preliminary investigation upang masagot naman ng Public Attorney’s Office ang kontra salaysay ni Bagcal at ng mga pulis.
Nahaharap ang tatlo sa mga reklamong double murder, torture at pagtatanim ng ebidensiya.
( Roderic Mendoza / UNTV Correspondent )
Napipikon na si PAO Chief Atty. Persida Acosta sa haba ng preliminary investigation ng DOJ sa kaso nina Carl Arnaiz at Reynaldo de Guzman.
Halos magdadalawang-buwan na ang imbestigasyon ng DOJ panel sa pagkamatay ng dalawang binatilyo, kayat hiniling niyang resolbahin na ang mga reklamong murder, torture at planting of evidence laban sa dalawang pulis-Caloocan.
Sa pagdinig kahapon, pinayagan pa ng panel sina PO1 Jeffrey Perez at PO1 Ricky Arquilita na isumite hanggang sa Biyernes ang salaysay nina Solomon Rosca at Madelene Soliman, na saksi umano sa insidente.
Ayon sa abogado ng mga pulis, malaking tulong ito sa kanilang depensa na napatay si Arnaiz matapos manlaban sa mga otoridad.
Pero aminado ang abogado na hindi pa nila nakakausap ang dalawang testigo dahil ngayon lang nila nakuha ang kopya ng salaysay na pinadala lamang sa LBC kaya’t hahanapin pa nila ito upang hikayatin na humarap sa DOJ panel.
Sabi naman ng PAO, wala na silang planong sagutin pa ang salaysay ng mga ito dahil tiwala silang malakas ang kanilang ebidensiya laban sa mga pulis.
( Roderic Mendoza / UNTV Correspondent )
Kinontra ng mga magulang ni Carl Angelo Arnaiz ang paratang ng dalawang pulis-Caloocan na napatay ang binatilyo sa isang lehitimong operasyon noong Agosto.
Binigyang-diin nila na mismong ang taxi driver na si Tomas Bagcal na ang nagsasabing hindi nanlaban ang kanilang anak at scripted lamang ang operasyon ng mga pulis.
Pinasisinungalingan din anila ito ng salaysay ng testigong si Joe Daniel na nakakita mismo na binaril si Carl habang nakaposas at nakaluhod.
Lumabas din anila sa forensic examination na pinahirapan muna ang biktima bago ito pinatay ng walang laban.
Iginiit naman ni Bagcal na tinakot siya nina PO1 Jeffrey Perez at PO1 Ricky Aquilita at binantaang papatayin pati ang kanyang pamilya kapag hindi sinunod ang script ng mga pulis. Ngunit nanindigan ito na hinoldap siya nina Carl at Reynaldo de Guzman alyas Kulot.
Nahaharap si Bagcal at ang dalawang pulis sa mga reklamong murder, torture at pagtatanim ng ebidensiya. Pakiusap ng mga magulang ni Arnaiz, huwag nang patagalin ang pagresolba sa mga reklamo.
Samantala, mariing itinanggi ng labindalawang pulis-Caloocan na sangkot sila sa pagpatay kay Kian delos Santos. Apat sa kanila, bagamat kasama sa operasyon ay wala sa crime scene nang mapatay ang binatilyo.
Hindi naman kasama sa operasyon ang walo at nadamay lamang dahil dati silang nakatalaga sa PCP 7 ng Caloocan police.
Itutuloy ang preliminary investigation ngayong Miyerkules.
( Roderic Mendoza / UNTV Correspondent )
Tags: Carl Arnaiz, DOJ, pulis-Caloocan
Humarap sa pagdinig ng senado kahapon ang taxi driver na umano’y hinoldap nina Carl Angelo Arnaiz at Reynaldo de Guzman alyas “Kulot” noong madaling araw ng August 18.
Ayon kay Tomas Bagcal, sumakay ang dalawa sa highway ng Navotas City bandang ala una ng madaling araw, ilang minuto ang makalipas ay nagdeklara ito ng holdap.
Ngunit sa tulong ng isang tricycle driver na nakapansin sa komosyon sa loob ng sasakyang ay nagawa nilang dalhin ang mga ito sa prisinto upang i-turn over sa mga pulis.
Ngunit sa halip na isasalim sa proseso ang mga ito, isang “Sir Lakay” ang tila nag-uutos sa kasama niyang mga pulis kung saan dadalhin ang dalawa.
Ayon sa taxi driver, nakarating sila sa C3 at dito na umano binaril ng mga pulis si Arnaiz.
Isang alyas Joe Daniel na umano’y nakakita sa pangyayari ang lumutang din sa pagdinig.
Sa kabila nito, ayon kay Senator Panfilo Lacson, may kailangan pa ring linawin ang prosekusyon sa naging pahayag ng dalawang testigo.
Kapwa itinuro ng dalawa sina PO1 Jeffrey Perez at PO1 Ricky Arquilita na siyang bumaril kay Arnaiz.
Tumanggi namang magsalita sa pagdinig ang dalawa at i-ninvoke ang right to self-incrimination.
Ayon kay Justice Secretary Vitaliano Aguirre, bago matapos ang Oktubre ay makakapaglabas na sila ng resolusyon sa kaso ni Kian Delos Santos.
Sisimulan na rin aniya nila ang preliminary investigation sa kaso ni Arnaiz at alyas Kulot sa susunod na linggo.
( Nel Maribojoc / UNTV Correspondent )
