Binaklas na ng Metropolitan Manila Development Authority ang lahat ng mga poster at campaign material na wala sa mga poster area na itinalaga ng Commission on Elections
Inotorisang COMELEC ang MMDA at Department of Public Works and Highways na tanggalin ang mga poster, streamer at tarpaulin ng mga kandidato na nasa puno, poste ng kuryente, traffic lights, mga kable ng kuryente, pader at waiting sheds.
Naglabas ang COMELEC ng listahan ng mga lugar kung saan dapat maglagay ng mga campaign poster
Hindi naman kasama sa binabaklas ang mga poster na nasa mga pribadong lugar
Ngayon lunes ang opisyal na campaign period sa lahat ng mga kakandidatong Presidente, Bise Presidente, Senador at Party list at sa March 26 pa ang mga Congressmen at ibang lokal na posisyon
Ngayon pa lamang ay marami ng mga tarpaulin at poster ng mga kandidato sa local na posisyon ang nabaklas ng MMDA.
Pinapakuhaan ng litrato ng MMDA ang mga poster na binabaklas upang magkaroon sila ng record, isa-submit nila ito sa COMELEC upang masampahan ng kaso ang mga nakalabag na pulitiko
Noong nakaraang halalan ay dalawampu’t dalawang dump truck na puno ng mga campaign material ang naalis ng MMDA
Lahat ng mga poster at tarpaulin na maiipon ay ibibigay sa mga institusyon upang mapagkakitahan.
Araw-araw ay iikot ang oplan baklas team ng MMDA sa iba’t ibang lugar sa Metro Manila hanggang sa matapos ang campaign period sa May 7.
(Mon Jocson/UNTV News)
Tags: illegal poster, Metropolitan Manila Development Authority
Hinikayat ng Metropolitan Manila Development Authority ang mga motorista na alamin ang mga towing rules upang hindi mabiktima ng mga mapagsamantalang towing company.
Batay sa towing procedure ng MMDA, sa loob ng limang minuto ang isang illegally park na abandonadong sasakyan na wala ang may ari ay dapat ng hatakin ng tow truck.
Ang mga sasakyan naman na iligal na naka park at nandoon ang may-ari ay titikitan lamang ng obstruction o illegal parking.
Sa mga sumbong at reklamo tumawag sa MMDA hotline number 136.
(UNTV RADIO)
Eksakto alas nueve ng umaga sa June 22, isang minutong patutunugin ang mga sirena ng bumbero at maging mga kampana ng simbahan sa buong Metro Manila bilang hudyat ng pagsisimula ng ikalawang Metrowide shake drill.
Subalit sa pagkakataong ito, kasama na sa drill ang probinsya ng Rizal, Bulacan, Cavite at Laguna dahil tatamaan rin ito ng west valley fault.
Ang drill ay pangungunahan ng mga local government unit kasama na ang mga barangay na nasasakupan ng bawat syudad at munisipalidad.
Hinikayat din ng MMDA ang iba’t ibang broadcast stations na makiisa at tulungan sila sa information dissemination upang mas maiparamdam sa lahat ang pagiging makatotohanan ng drill.
Kapag tumunog ang sirena at kampana, inaatasan ang lahat na isagawa ang duck cover and hold at mabilis na magtungo sa ligtas na lugar.
Mahalaga na maipagpalagay ng lahat na may totoong tumama ang isang malakas na lindol
Inaasahang makikiisa ang lahat kabilang na ang mga estudyante at empleyado sa mga kumpanya lalo na sa Makati at Ortigas business district.
Maging ang malalaking shopping malls ay makikiisa rin sa drill at ngayong pa lang ay inihahanda na ng mga mall operator ang sistema upang hindi ito pagmulan sa stampede.
Ngunit higit sa lahat, ang partisipasyon ng mga nasa residential area ang higit na mahalaga sa drill na ito.
Hahatiin ang Metro Manila sa apat na bahagi upang mas maging madali ang pagsasagawa ng evacuation sa mga biktima ng lindol.
Kabilang dito ang Villamor airbase sa pasay bilang south sector, Intramuros sa Maynila bilang west sector, VMMC golf course sa Quezon City bilang north sector at LRT 2 Santolan station grounds sa east sector.
(Mon Jocson / UNTV Correspondent)
Tags: Ikalawang Metrowide earthquake drill, June 22, Metropolitan Manila Development Authority
Ipapatupad na sa Abril 15 ng Metropolitan Manila Development Authority (MMDA) ang implementasyon ng “no-contact apprehension policy”.
Sa ilalim ng “no-contact apprehension policy”, gagamit na lamang ng closed circuit television cameras (CCTVs) sa paghuli ng mga pasaway na motorista na siyang magsisilbing basehan at ebidensiya laban sa mahuhuling lumabag.
Mayroon nang 50 cameras ang ipinuwesto ng MMDA sa iba’t ibang lugar sa Metro Manila ngunit ito’y pauna pa lamang dahil madagdagan pa ng 100 cameras.
Lahat ng mahuhuli at makukunan ng paglabag ay kukunin na lamang ang plaka ng behikulo para maiberipika sa LTO ang nagmamay-ari nito. Kapag natunton na ay ipapadala na lamang ang summon at traffic violation receipt sa kanilang natukoy na address.
Sa paraan na ring ito ay maiiwasan na ang insidente ng kotong gayundin ang sagabal sa trapiko.
Ang impementasyon ng “no-contact apprehension policy” ay gagawin nang permanente base na rin sa inaprubahang resolusyon ng Metro Manila Council (MMC) noong nakaraang buwan.
(UNTV NEWS)
Tags: Metropolitan Manila Development Authority, No Contact Apprehension Policy
