Pinapaimbestigahan na ng Office of the Ombudsman ang director ng Bureau of Plant Industry o BPI na si Clariton Barron sa reklamong graft at direct bribery.
Kaugnay ito ng umano’y pagtanggap ni barron ng 240 thousand pesos sa suhol para magisyu ng import permit ng bawang noong July 2012.
Ayon sa Ombudsman, nasa preliminary investigation na ang reklamo laban kay barron at maaari itong patawan ng preventive suspension.
Enero nang nakaraang taon nang maghain ng reklamo ang National Bureau of Investigation laban sa mga opisyal ng BPI sa Ombudsman dahil sa umano’y hoarding ng mga bawang na nagresulta sa pagtaas ng presyo nito sa merkado.
Tags: Bureau of Plant Industry, Director, garlic cartel isyu, Ombudsman
Isang preventive suspension ang ipinatupad ng Department of the Interior and Local Government (DILG) laban kay Malay Municipal Mayor Ceciron Cawaling matapos pirmahan ng Office of the Ombudsman ang resolusyon kaugnay sa mga reklamong isinampa ng DILG laban sa alkalde at iba pang opisyal sa Aklan.
Ayon kay DILG Secretary Eduardo Año, ika-23 ng Oktubre nang lagdaan ng Office of the Ombudsman ang resolusyon sa preventive suspension ni Cawaling habang Miyerkules naman nang matanggap ito ng DILG.
Hunyo nitong taon nang magsampa ng kasong kriminal at administratibo ang DILG sa Ombudsman laban sa 17 opisyal ng probinsya ng Aklan at bayan ng Malay.
Kaugnay ito ng umano’y anomalya sa pagpapatupad ng environmental laws sa isla at sa hindi maayos na paggamit ng environmental fee na kinokolekta sa mga turistang pumapasok sa Boracay.
Sa labing pitong opisyal, tanging si Mayor Cawaling pa lamang ang mapatawan ng preventive suspension sa ngayon.
Dahil sa pagkakasuspinde kay Mayor Cawaling, si Vice Mayor Abraham Sualog na muna ang uupo bilang acting mayor ng bayan ng Malay batay sa mga panuntunan ng DILG.
Sa kabila ng biglaang pagbabago, sinabi naman ng DILG na susuportahan nila ang mga current officials ng Malay, Aklan sa pagpapatupad ng mga panuntunan para sa ikauunlad ng kalikasan ng Boracay at para sa Tourism sustainability nito.
Samantala, nagsagawa naman ng capability demonstration exercises ang Metro Boracay Police Task Force sa white beach sa Boracay kahapon.
Sari-saring scenarios o eksena katulad ng mass drowning, oil spill, terrorism at bombing incident ang nakapaloob sa exercise.
Ayon sa PNP, bagaman walang natatanggap na anomang banta sa isla, mabuti na anila na maging handa lalo na ngayong inaasahan ang muling pagdagsa ng mga turista sa isla.
( Vincent Arboleda / UNTV Correspondent )
Dagsa ang mga mamimili sa Bureau of Plant Industry (BPI) compound sa Malate, Maynila matapos ang muling pagbubukas Tienda Malasakit Store kaninang alas siyete ng umaga.
Mabibili sa mga outlets ang mga gulay, prutas, isda, dressed chicken at maraming iba pa na mas mura ang presyo kumpara sa mga pamilihan.
Ang mga nasabing commodities ay galing pa mula Mindanao sa bayan ng Talakan, Bukidnon. Ito ay bilang pagpaparami ng suplay sa National Capital Region (NCR) matapos maapektuhan ang Northern Luzon at Central Luzon ng Super Thypoon Ompong.
Sagana sa gulay ang Talakag, pero pahirapan sa mga magsasaka kung paano ikalat sa pamilihan ang kanilang mga produktong agrikultura.
Ipinadala noong Miyerkules ang mga produkto sa pamamagitan ng C-130 Cargo Transport Aircraft at dalawang B-727 Cargo Planes ayon sa Department of Agriculture (DA).
Linggo-linggo nang magluluwas ng mga gulay mula sa Mindanao patungo ng Metro Manila para mabigyan ng murang halaga ng bilihin ang publiko.
Bukas sa araw ng Biyernes at Sabado, alas siyete ng umaga hanggang sa maubos ang kanilang tinda.
Batay sa presyuhan mula sa Bukidnon, 90 piso lang ang siling haba, ang patatas 75 piso kada kilo, carrots 95 piso kada kilo, repolyo 65 piso kada kilo, ang sayote 45 piso kada kilo, habang ang prutas tulad ng durian ay 100 piso kada kilo, pinya 35 piso, saging na saba 25.00 at mais 35 piso ang isang kilo. Mahigit limampung porsyento ang binaba nito kumpara sa mga palengke.
Target ng Department of Agriculture na palawakin pa ang malasakit food outlets sa iba’t-ibang barangay sa Metro Manila sa pakikipagugnayan sa mga lokal na pamahalaan.
Laking tuwa naman ng mga mamimili dahil nakakabili na sila ng murang gulay.
( Reynante Ponte / UNTV Correspondent )
Tags: Bureau of Plant Industry, Maynila, Tienda Malasakit Store
25% ng mga brand ng pangunahing bilihin na minomonitor ng Department of Trade and Industry (DTI) ang nagtaas na ng presyo.
At upang hindi mahirapan ang mga mamimili, pinakiki-usapan ngayon ng DTI ang nalalabing 75% na kung maaari ay huwag nang sumunod sa price increase hanggang matapos ang taon.
Ayon sa ahensya, ilan sa mga ito gaya ng manufacturer ng sardinas, canned meat at mga sabong panlaba ang tumugon na sa kanilang panawagan.
Samantala, hinihintay pa ng DTI ang sagot ng mga kumpanyang gumagawa ng gatas, kape at noodles.
Bunsod nito, nakatakda ring i-update ng DTI ang listahan ng kanilang expanded SRP. Tinitiyak ng DTI na sisikapin nilang mapanataling stable ang presyo ng mga pangunahing bilihin.
Gayunman, kailangan ring tutukan ang pagtaas ng presyo ng mga agricultural products gaya ng bigas, gulay, isda, manok at baboy.
Plano naman ng isang consumer group na ihabla sa Ombudsman ang mga opisyal ng DTI dahil sa hindi pagsunod ng mga ito sa kanilang mandato.
Ayon sa Laban Konsyumer group, nilalabag ng DTI ang public service at good governance na isa sa kanilang mga pangunahing katungkulan.
Si Vic Dimagiba ang unang nagmungkahi na magpatupad ng moratorium ang DTI sa dagdag presyo. Nais ng grupo nito na siyam na buwang walang dagdag presyo sa mga pangunahing bilihin.
Sinabi rin ni Dimagiba na walang political will ang DTI upang bantayan na mapapababa ang presyo ng mga pangunahing bilihin.
Nanindigan naman ang mga economic managers ng Pangulong Duterte na ang mga pagtaas sa presyo ng mga bilihin ay hanggang sa katapusan lamang ng taon at magiging stable na ito sa susunod na taon.
( Mon Jocson / UNTV Correspondent )
