10 suspek sa pagpaslang sa guardya ni dating Biliran Rep. Glenn Chong, sumuko sa Legazpi City Police Station

by Radyo La Verdad | February 22, 2022 (Tuesday) | 424

Arestado ang 10 suspek na may kinalaman sa pagpaslang noong 2018 sa security aid ni dating Biliran Representative Glenn Chong at kanyang kasamang babae, sa Legaspi City Police Station nitong Lunes (February 21).

Kinikilala ang mga suspek na sina Staff Sgt. Julius Villadarez, Staff Sgt. Richard Raagas, Cpl. Arthur Gerard Ignacio, Pat. Napoleon Relox, Pat. Jordan Antonio, Pat. Marvin Santos, at Pat. Terry Anthony Alcantara, mula sa Philippine National Police (PNP)-Rizal; at sila  Cpl. Merwin Macam, Cpl. Diogenes Barrameda Jr., at Pat. Efren Areola na miyembro ng Highway Patrol Group ng Police Regional Office 4-A (CALABARZON).

Ayon kay Maj. Malu Calubaquib, spokesperson ng Police Regional Office-Bicol (PRO-5), nagtago ng 3 taon ang mga nasabing suspek matapos silang maiugnay sa pananambang kay Richard Red Santillan, close-in-aide ni dating Rep. Chong at Gessamyn Casing na nasa loob ng kanyang sasakyan sa kahabaan ng bayan ng Cainta noong December 10, 2018.

Dagdag ni Calubaquib, ang mga naarestong suspek ay kabilang sa 20 indibidwal na binanggit sa warrant of arrest na inisyu ng Regional Trial Court Branch 99 sa Antipolo City para sa kasong murder.

Nasa kustodiya na ngayon ng himpilan ng pulisya ng lungsod ang mga suspek at handa ng ituturn-over sa PNP Calarbazon matapos sumailalim sa iilang dokumentasyon.

(Myrveiña Natividad | La Verdad Correspondent)